Alisher Navoiy. Mukammal asarlar to’plami. 3-jild

Description

Алишер Навоий лирик меросининг мукаммал нашри илк бор
1959-1960 йилларда Ўзбекистон Фанлар академиясининг А. С.
Пушкин номидаги Тил ва адабиёт институти томонидан
тайёрланган ва Ўзбекистон ФА нашриёти томонидан амалга
оширилган эди. «Хазойин ул-маоний» девонлари нашрини
Ўзбекистонда хизмат кўрсатган фан арбоби, Беруний мукофоти
лауреати, филология фанлари доктори, профессор Ҳамид
Сулаймон тайёрлаган эди. 1956-1960 йилларда тайёрланган
илмий-танқидий текст ва транслитерация асосан собиқ
Иттифоқдаги фондларда сақланаётган қўлёзмалар
(Ленинграддаги Салтиков-Шчедрин номли Давлат халқ
кутубхонаси, инв. Хаников-55, 904- 1498-1499 й., Тошкент,
Ўзбекистон ФА ШИ, инв, No 677, XVI аср ва Ленинград, ДХК, инв.
Дорн-558, 1001-1004-1592-1596 й.) ва бошқа нусхалар асосида
тузилган эди. Алишер Навоий номидаги Ўзбекистон Давлат
адабиёт музейи, Ўзбекистон ФА Қўлёзмалар институтининг
директори, профессор Ҳамид Сулаймоннинг фаолияти билан
кейинчалик Алишер Навоийнинг мўътабар икки куллиётининг
фотонусхаси қўлга киритилди. Булар Алишер Навоий
куллиётининг Истанбулда, Тўпқопи саройи фондида (инв. No 808)
сақланаётган нусхаси, 901-902-1495-1497 йиллари хаттот Дарвеш
Муҳаммад Тоқий томонидан Ҳиротда кўчирилган ҳамда Париж
Миллий кутубхонасида (инв. No 316—317) сақланаётган, 930—
933-1525—1527 йилларда котиб Али Ҳижроний томонидан
Ҳиротда кўчирилган икки жилдлик куллиёт фотонусхаларидир.

Ҳар иккала куллиёт композиция ва мундарижа жиҳатидан бир-
бирига яқин.